អារ៉ាប៊ីសាអូឌីត៖ កំពូលកីឡាករសញ្ជាតិព័រទុយហ្គាល់ Cristiano Ronaldo នឹងត្រូវបន្តរង់ចាំការបង្ហាញខ្លួនលើកដំបូងសម្រាប់ក្លិប Al Nassr ត្បិតបញ្ហានាពេលនេះគឺ Ronaldo នៅមិនទាន់អាចចូលលេងជាមួយក្លិបបានឡើយ ដោយសារបញ្ហាលើសចំនួនកូតាកីឡាករបរទេសដែលកំណត់ដោយលីគអារ៉ាប៊ីសាអូឌីត។

ក្នុងការបង្ហាញខ្លួន និងការស្វាគមន៍យ៉ាងកក់ក្តៅពីអ្នកគាំទ្រជាង ២៥,០០០នាក់ កីឡាករវ័យ ៣៧ឆ្នាំរូបនេះនិយាយថា លោកពិតជាអន្ទះសារក្នុងការបង្ហាញខ្លួនជាមួយក្រុមថ្មី ពោលគឺចង់ចូលប្រកួតនាថ្ងៃព្រហស្បត៍នេះតែម្តង ក្នុងជំនួបជាមួយក្លិប Al Ta’ee នៅកីឡដ្ឋាន MRSOOL Park។

យ៉ាងណាមិញ ការមកដល់របស់ Ronaldo ក្នុងតម្លៃកំណត់ត្រា ២០០លានដុល្លារនេះ ក្លិប Al Nassr បានលើសកូតាកីឡាករបរទេសដែលកំណត់ដោយសហព័ន្ធបាល់ទាត់អារ៉ាប៊ីសាអូឌីតទៅហើយ ដោយ Ronaldo ជាកីឡាករបរទេសទី៩ ខណៈសហព័ន្ធបាល់ទាត់អារ៉ាប៊ីសាអូឌីតកំណត់ឱ្យក្លិបនីមួយៗមានការចុះបញ្ជីកីឡាករបរទេសត្រឹម ៨នាក់ប៉ុណ្ណោះ។

មន្រ្តីក្លិប Al Nassr ម្នាក់បានបញ្ជាក់ថា Ronaldo នៅមិនទាន់បានចុះបញ្ជីជាមួយក្លិបនៅឡើយទេ ដោយក្លិបមិនទាន់ផ្ទេរចេញកីឡាករបរទេសសម្រាប់ការចុះបញ្ជីថ្មីសម្រាប់ Ronaldo។ កីឡាករបរទេសសំខាន់ៗរបស់ Al Nassr រួមមានអ្នកចាំទីកូឡុំប៊ី David Ospina, កីឡាករប្រេស៊ីល Luiz Custavo និង Anderson Talisca រួមទាំងកីឡាករកាមេរ៉ូន Vincent Aboubakar។ បើតាមប្រភពបន្ថែមឱ្យដឹងថា ខ្សែបម្រើអ៊ូបេគីស្ថាន Jaloliddin Masharipov មានភាគរយខ្ពស់ជាងគេក្នុងការចាកចេញ និងទុកកូតាបរទេសសម្រាប់កីឡាករ Cristiano Ronaldo៕